ويكيپيديا ب الداريجة
ويكيپيديا لمغريبية ولا ويكيپيديا ب دّاريجة، هيا ڤيرسيون ديال لموسوعة ويكيپيديا ب داريجة لمغريبية، تدارت ف 10 يوليوز 2020.[1][2] و وصل عدد لمقالات ديالها نهار 4 يونيو 2023 ل 6,712 مقالة، و ف لمجموع 57,041 صفحة، ب 279,861 تبديل. كاينين فيها 9,439 خدايمي مقيّد و 55 خدايمي مداوم (لي دارو تبديل ف شّهر لّخر) ، ب لإضافة ل 7 ديال ليمغارن (إداريين).
ف نونبر 2022، ويكيپيديا ب دّاريجة تشافت كتر من 430.000 مرة، لي مامحسوبينش فيهوم شّوفات ديال بوتات ؤلا پروݣرامات ؤطوماتيكية. ؤ ف لمجموع تّقراو لمقالات د ويكيپيديا لمغريبية كتر من 5 د لمليون مرة من نهار بدات ف يوليوز 2020.[3]
هاذ المشروع جا من بعد ما رتافعت العديد من الأصوات لي كتنادي بالكتابة بالدارجة باش الناس كاملة تفهم و المعلومة توصل بطريقة مباشرة و قريبة للمتلقي، الشي لي خلا فعلا الشركات ف المغرب يلتجؤو للاشهارات بالدارجة، نفس الشي بالنسبة للنشرات الاخبارية الطارئة و لي خاص يفهمها ڭاع الناس فجميع المستويات و الأعمار (حملة التحسيس ضد كورونا كمثال).
لكن و ف غياب قواعد للكتابة بالدارجة، مضبوطة مزيان، رجع كل واخد يكتب بطريقة فشكل، شي مرات تلقى مقالات كاتغلب عليها لفرنساوية، و الكلمات لي أصلها عربي بقاو كيكتبوها بطريقة متصبش فعملية النطق ديالها الصحيح، بحال كلمة (مغريب) نقدرو نكتبوها مغرب و نطقولها مغريب حسب اللهجة نتاعنا. مجهودات كبيرة باقين يقدرو يتدارو فهاد المجال حيت حتى الدارجة تطورات و رجعات فيها بزاف المستويات و طرق ديال الهدرة، السياسي لي يتكلم بيها ماشي بنفس الطريقة غيهدر بيها العامل البسيط ولّا الفلاح ولّا شي واحد تزاد ف 2005.
و كتبقى اللغة العربية هي اللغة الأكثر تأثيرا على الدارجة وخا كتحتاوي على بزاف ديال الكلمات عبرية و أمازيغية و من لوغات ؤروپية.
تاريخ
ف 2008، كانت ويكيپيديا ب دّاريجة بدات، بحال بزاف د لويكيپيديات لوخرين، ف لانكوباتور (ب لعربية الحاضنة)، لي هوّا سيت خاص تابع ل مؤسسة ويكيميديا كيتدارو فيه لمشاريع د ويكيميديا لي باقين ف لمرحلة تّجريبية. بزاف لي خدمو عليها ف لبدية كانو تابعين ل مشروع كتب داريجة، ؤ كانت لكتابة فيها ب لأساس ب لحروف لّاتينية، وخا بقات نوع د لفوضا ف لكتابة بشكل عام.[4]لمشروع ماتنضّم مزيان تال 2019، فاش بدات لخدمة عليه بشكل جدي، تا خرج من لانكوباتور بشكل رسمي ف 10 يوليوز 2020.
ف ماي 2021، كان لمجموع د شّوفات د ويكيپيديا ب دّاريجة وصل ل 900.000 من نهار بدات.[5]
مؤسسين
لكتاتبيا لي خرّجو ويكيپيديا ب دّاريجة من لانكوباتور:
إحصائيات عامة
ويكيپيديا ب دّاريجة:
- فيها كتر من 51000 صفحة (منهوم مقالات، تصنيفات، موضيلات، صفحات د شّرح ؤ لمعاونة...)
- تكتبو ف لمقالات ديالها ل حد سّاعة كتر من 980.000 كلمة
- تشافو صّفحات ديالها كتر من 5 د لمليون مرة من نهار بدات
عيون لكلام
- ^ Yousra Jaa (10 يونيو 2021). "La darija fait son entrée dans Wikipédia". medias24.com (ب لفرانساوية).
- ^ "Create Moroccan Arabic Wiki ويكيپيديا ب الداريجة" (ب نڭليزية).
- ^ [w.wiki/6BoX "إحصائيات د ويكيپيديا ب دّاريجة مابين يوليوز 2020 ؤ دجنبر 2022"] Check
|url=value (معاونة). - ^ مداكرة:الصفحة اللولا
- ^ "How can editing contests support smaller Wikipedias? (Arctic Knot Conference 2021)". 22 يونيو 2021.
 | تقدر تزيد شوف بزاف د تّصاور و لمعلومات ديال Moroccan Arabic Wikipedia ف ويكيميديا كومنز. |
 هادي زريعة ديال مقالة خاصها تّوسع. تقدر تشارك ف لكتبة ديالها. |