Bandera de Suecia

L'antigüedá de la bandera sueca nun pudo ser determinada con exactitú. Ta documentado l'usu d'una tela azul con una cruz mariella como símbolu dende'l sieglu XVI. Según una orde real de 1569, la cruz mariella tenía de figurar siempres en banderes sueques, yá que l'escudu del monarca tenía una cruz dorada ente campos azules. El modelu de la bandera foi, en realidá, la bandera danesa, procediendo tamién les colores probablemente del escudu del soberanu. Les primeres pruebes del so usu en naves sueques son, sicasí, de la tercer década del sieglu XVII, esto ye, del reináu de Gustavo II Adolfo.

Según la Llei de Banderes más antigua esistente en Suecia, de 1663, había qu'usar una enseña de trés puntes, sacante nos barcos mercantes, que la so bandera yera de contorna recta.

Mientres los años ente 1844 y 1905, los buques pertenecientes a la marina mercante usaron una bandera na que se combinaben les colores de les banderes de Noruega y Suecia, entós xuníes.

Dende 1916 viénose celebrando'l 6 de xunu como'l Día de la Bandera Nacional que convirtióse, en 1983, nel día de la Fiesta Nacional. Escoyóse esa fecha por dos razones: Gustavo Vasa foi escoyíu rei de Suecia'l 6 de xunu de 1523, sentándose asina les bases del futuru Estáu nacional suecu. El mesmu día del añu 1809, entró a valir en Suecia una nueva llei fundamental sobro la forma de gobiernu que, ente otres coses, estableció llibertaes y derechos pa los ciudadanos.

Usu n'actualidá

La bandera suel ser izada oficialmente a les 8 de la mañana ente'l 1 de marzu y el 31 d'ochobre, y, el restu del añu, a les 9 de la mañana, siendo arriada a la puesta del sol. Si la bandera ta allumada, puede permanecer izada mientres la nueche. Hai establecíos los díes festivos en que ye obligatoriu oficialmente izar bandera.

Esisten versiones de la bandera nacional que terminen en trés puntes, y son usaes poles fuerces armaes y la familia real. Les banderes emplegaes pola Casa Real Sueca van provistes tamién col escudu nacional pequeñu o grande asitiáu nel centru de la bandera. Nun hai creador específicu d'esta bandera.

• Les colores de la bandera de Suecia fueron utilizaos pal uniforme del Club Atlético Boca Juniors.
• Significaos de les colores: Para los suecos, l'azul de la bandera representa la verdá, la llealtá y la xusticia. El mariellu representa l'arrogancia.

•   Wikimedia Commons acueye conteníu multimedia sobre Bandera de Suecia  .